Ақтөбе облысындағы табиғи апат аймағындағы зардап шеккен тұрғындарға көмек қолын созамын деген волонтерлер мен облыс тұрғындары Түркістан облысы “Жастар ресурстық орталығы” ғимаратында арнайы штабта белсенді жұмыс істеуде.
Облыстық жастар орталығында 27 наурыздан бастап гуманитарлық көмек қабылдауда. Алғашқы күні ақ қалалық мәслихат депутаттары, жергілікті қалталы азаматтар ең қажетті және жолға жарамды заттармен қамтып үлгерді. Бірнеше жыл бұрын өңірімізде орын алған төтенше жағдайда ел бірлігі мен нақты көмектерді көрдік. Жақсылыққа екі есе жақсылықпен қайырымдылық жасауға тырысатын халықпыз.
Қазіргі таңда түркістандықтар киім-кешек, көрпе-төсек, тұрмысқа қажетті заттар жинап үлгерді. Қалалық жастар орталығынан құрылған штабтар облысқа келіп, атсалысып жұмыстар жүргізіп жатыр. Ақтөбеге өңірдің 10 белсенді жасы апатты қалпына келтіру жұмыстарына қатысып, зардап шеккен тұрғындарға көмек көрсетеді.
Айта кету керек, Су ресурстары және ирригация министрлігінің хабарлауынша, қазір жергілікті атқарушы органдармен бірлесіп, стратегиялық нысандардың қауіпсіздігін қамтамасыз ету, су қоймаларына тасқын суын жинау және оны қауіпсіз өткізу үшін жұмыс істеп жатыр. Бүгінде еліміздің оңтүстігіндегі су қоймалары суару кезеңіне дайындалып жатыр. Орталық, солтүстік, батыс және шығыс өңірлерде тасқын суын қауіпсіз өткізу іс-шаралары жүргізілуде. Министрлік жанындағы жедел штаб әкімдіктермен өзара тығыз байланыс орнатты. Республикалық меншіктегі барлық гидротехникалық құрылыстарда тасқын суын апатсыз өткізу жөнінде іс-шаралар жоспары мен су қоймаларының жұмыс кестесі бекітілді. Жауапты мекеме қызметкерлерінысандарға тәулік бойы бақылау орнатқан.
