Түркістан облысы Шардара ауданы әкімдігі және жеке кәсіпкерлердің қолдауымен Ақтөбе облысындағы табиғи су апаты аймағында зардап шеккен тұрғындарға көмек қолын созып жатқан 50-ден астам ерікті жастар мен автоволонтерларға Түркістан облысының атынан ауызашар берді.
Түркістан облыстық “Жастар ресурстық орталығы” КММ-нің басшысы Ернар Нұралыұлы су тасқыны салдарынан зардап шегіп, үй-жайлары мен малдарынан айрылған Ақтөбе жұртшылығына ыстық ықыласын жеткізді.
-Ел басына күн туған шақта біз Түркістан облысының халқы сіздермен біргеміз. Бірлік бар жерде тірлік бар деп бабаларымыз текке айтпаған. Күшіміз бірлікте екендігін көрсетіп, бұл сынақты да ел болып еңсеріп шығамыз, -деді ол.
Ақтөбе облысының Жастар саясаты мәселелері басқармасының басшысы Ермағанбетов Мирхан Асылханұлы осындай қиын-қыстау кезеңде көмек көрсетіп, қолғабыс жасап біздің өңірмен бірге екендігін шынайы ықыласпен білдірген киелі Түркістан облысының халқына алғыс айтты.
Белсенділер алғашқы күннен бастап, гуманитарлық көмек пункттерін ашып, сақтық шаралары туралы халық арасында ақпараттық-түсіндіру жұмыстарын да жүргізіп жатыр. Ал, автоволентерлар халықты эвакуациялау жұмысы кезінде белсенділік танытып, тұрғындарды қауіпсіз орындарға көшіру жұмыстары барысында өздерінің жеке көліктерімен тасымалдауға көп көмегін тигізді.
Атап айтсақ, еліміздегі су тасқынынан зардап шеккен аймақтарда, көмек көрсету пунктерінде 20.000 волонтер жұмыс атқарып жатыр. Олар тұрғындарды су басқан жерлерден эвакуациялап, қауіпсіздік және құтқару қызметтерінің өкілдеріне ыстық шай мен тамақ үлестіріп көмек қолын созуда. Алдағы уақытта да еріктілер тарапынан атқарылатын жұмыстар жалғасын табатын болады.
