Түркістан облысына іссапармен келген ҚР Сенатының спикері Мәулен Әшімбаев өңірдің белсенді жастарымен кездесті. Кездесуді облыс әкімі Дархан Сатыбалды жүргізіп отырды. Сенат төрағасы өз сөзінде мемлекет тарапынан жастарды қолдауға арналған шаралардың маңыздылығына тоқталып, ұлтымыздың жаңа келбетін айқындайтын құндылықтарға назар аударды. Сондай-ақ жүргізіліп жатқан саяси және экономикалық реформаларды қоғамдағы іргелі әлеуметтік-мәдени өзгерістермен үйлестірудің маңызы зор екенін жеткізді.
«Қазіргі таңда білімді жастардың кәсіби тұрғыдан өсіп, дамуы үшін мол мүмкіндіктер бар. Мемлекет тарапынан кешенді қолдау шаралары қабылданып жатыр. Сондықтан жастар елдің болашағы өздеріне тікелей қатысты екенін сезінуге тиіс. Президентіміз Қасым-Жомарт Кемелұлы Тоқаев Ұлттық құрылтайда еліміз үшін аса маңызды жасампаз құндылықтарды белгілеп берді. Аталған басымдықтар Әділетті Қазақстан құру жолында айрықша мәнге ие және бұл қағидалар жас буын үшін қашанда маңызды бағдар болуы керек», – деген Мәулен Әшімбаев. Сондай ақ ол жастардың сапалы білім мен рухани құндылықтарға деген ерекше ынтасы Қазақстанның бәсекеге қабілеттілік әлеуетін арттыра түсетініне сенім артатынын айтты.
Кездесу барысында белсенді жастар Сенат спикеріне өздерін толғандырып жүрген сұрақтарын қойып, тұшымды жауаптарын алды.
Айта кету керек, елімізде мемлекет тарапынан қабылданған шаралар мен бағдарламалар тиімді жұмыс істеуде. Мәселен, жас кәсіпкерлерге арналған «Бастау Бизнес» және қайтарымсыз несиелер мен грант беру жобалары, жас мамандарға арналған «Дипломмен ауылға», «Жастар практикасы» «Серпін» және тағы да басқа жастарды қолдауға арналған бағдарламалар өз нәтижесін беруде.
