Егер есімізде болса, өткен жылы ҚР Президенті Қасым-Жомарт Тоқаевтың тапсырмасына сәйкес, 21-35 жас аралығындағы азаматтарға 2,5 пайыздық шағын несие беру бағдарламасы іске қосылған еді. Қазіргі таңда бағдарламаның игілігін көргендердің қатары күн санап артып жатыр.
Солардың бірі – жас кәсіпкер Алпысбаева Сандуғаш Силқынбекқызы. Сандуғаш Бәйдібек ауданы, Алғабас ауылдық округі, Таңатар ауылында тұрады. 2023 жылы өз кәсібін бастау мақсатында 2,5 пайыз жеңілдетілген несие алу үшін «Аграрлық несие корпорациясы» АҚ-на өз бизнес жобасын ұсынып, нәтижесінде несиеге қол жеткізіпті.
-Қазіргі таңда өз қора жайымда жылқы малының аналық басын көбейтуді қолға алып отырмын. Алдағы уақытта одан шыққан өнімнен ауыл, аудан көлемінде бренд қалыптастырсам деген мақсатым бар. Жалпы осы шағын несие туралы алғаш рет әлеуметтік желіден естіп, бизнес жоспар дайындап қатысуға бел байладым. Нәтижесінде несиені алып 11 жылқы сатып алдым.
Үй шаруасында жұбайы екеуі мал шаруашылығын дамытып, отбасылы жас кәсіпкерлер қатарына қосылып отыр. Жас кәсіпкер жастарға тәуекелшіл, жауапкершілігі мол және мемлекет тарапынан берілетін мүмкіндіктерді барынша қолдануға тырысыңыздар деген өз ізгі ниетін жеткізді.
Сандуғаш сияқты шағын несиенің шарапатын көргендер Мақтаарал ауданы Иіржар ауылдық округіндегі Дүйсекеевтер отбасын айтуға болады. Жылыжай шаруашылығы бойынша жеңілдетілген 2,5% несиеден 5 млн тенге алып, өз кәсібін жүргізіп жатыр.
Қазіргі таңда Дүйсекеевтер отбасы жылыжай ашып, қияр өндіруде. Қазіргі таңда қияр күн сайын 50-60 кг шамасында өнім береді. Қияр піскен кезде жұмыссыз жүрген ауыл жастарды жұмыспен қамтуда.
Дуйсекеевтер отбасы жастарды мемлекеттен беріліп жатқан мүмкіндіктерді тиімді пайдаланып жұмыс істеуге шақырады.
