«Таза Қазақстан» республикалық акциясы ел аумағында жалғасып жатыр. «Киелі мекен» апталығы аясында Бәйдібек ауданындағы киелі мекендер мен туристік нысандарды аббаттандыру жұмыстары жүргізілуде.
Мемлекет және қоғам қайраткері Оразкүл Асанғазықызы экологиялық акцияның «Киелі мекен» апталығына өз үлесін қосуда. Бәйдібек ауданына арнайы сапармен келген Оразкүл Асанғазиева «Аппақ ишан» сәулет-көркем мүзейінде аудан жастарымен бірге шырша көшетін отырғызды.
– Бір кездері өзім қызмет еткен Бәйдібек ауданына келіп, «Аппақ ишан» киелі орнында аудан жастарымен және музей қызметкерлерімен бірге ағаш отырғызып жатырмыз. Мемлекет басшысының бастамасымен қолға алынған акцияның жастарға берері мол. Бұл аптада халқымыз үшін қадірлі қасиетті орындарға арнайы барып, тазалық жұмыстарын жүргізіп, жастарға өнегелі үлгі көрсету аға ұрпақтың борышы болмақ. Киелі орындар – біздің тарихи мекеніміз. Қазіргі таңда жастарға ұлы тарихымыздан сыр шертіп тұрған сәулет-көркем музейі, – деді Оразкүл Асанғазықызы.
Жалпы «Киелі мекен» аптасында Түркістан облысында 170 іс-шара өткізу жоспарланған. Соның ішінде зиярат етушілер мен туристер көп келетін Сауран қалашығы, «Укаша ата» мен «Жүсіп ата» кесенесі, Ысқақ баб пен Баба түкті Шашты Әзіз кесенесі секілді киелі орындар тазаланады. Алдағы уақытта «Жасыл аймақ», «Өнегелі ұрпақ», «Мөлдір бұлақ» науқаны бойынша өңірде іс-шаралар қолға алынып, тұрғынрдар мен жастар көптеп тартылмақ. Сонымен қатар, түркістандық белсенді жастар «Қаратау» қорығында тазалық жұмыстарын жүргізді. Игі шараға Түркістан облыстық «Жастар ресурстық орталығының» мамандары, «Жастар рухы» жастар қанаты белсенділері, кентаулық жастардан құралған жалпы 200-ге жуық адам қатысты.
