Кентаудан Құлсарыға хат

Құлсары қаласындағы су тасқыны ел тұрғындарын бей-жай қалдырған жоқ. Халық қолынан келгенше қаржылай да, қол көмегін де беріп жатыр. Осы ретте кентаулық бүлдіршін су тасқынынан зардап шеккен халыққа өзінің кішкентай жүрегінен шыққан қайырымдылығын көрсетті.
11 жастағы Гауһар Шәймерден өзінің жыл бойы жинаған қаражатын көмек қабылдаушыларға табыс етті. Көк қорапшаға салынған ақша жинағыштың қасында арнайы жазылған хат та бар. «Құлсарыға Кентаудан сәлем!» деп басталатын жазбада жасөспірім кентаулық оқушылардың өздерімен бірге екенін баяндаған.
«Мен Сіздердің ауыр жағдайларыңызды көріп, қатты уайымдадым. Сіздер қазақтың батыр ұлдары мен қыздарысыздар. Сондықтан бұл қиындықтан аман-есен өтетіндеріңізге сенімдімін», — делінген хатта.
Құлсарылықтардың жағдайына алаңдаған кентаулық қыз өз қолдауын осылай білдірді. Құлсарыға Кентаудан сәлем жолдаған жасөспірім су тасқынынан зардап шеккен аймақтағы ауыр ахуалды көріп қатты уайымдапты.
Кентау қаласында су тасқынынан зардап шеккен аймақтарға гуманитарлық көмек жиналуда. Орталық алаңға қойылған жүк көлігіне қала тұрғындары қажетті заттарды әкеліп, өткізіп жатыр. Олардың ішінде азық-түлік пен күнделікті тұтыну тауарлары бар. Игі іске жергілікті кәсіпкерлер ұйытқы болып отыр. Сондай-ақ арнайы ашылған есеп-шот арқылы да қаржы жинақталуда.
Айта кетейік, Атырау облысындағы су тасқыны жағдайына байланысты Құлсары қаласынан Маңғыстау облысының қалалары мен аудандарына 26 мыңнан астам адам эвакуацияланды.
Төтенше жағдайлар министрлігінің мәліметіне қарағанда, адамдар уақытша орналастыру пункттеріне, туыстары мен еріктілердің үйлеріне орналастырылды. Қауіпсіз жерге көшірілген халыққа Мемлекеттік материалдық резервтер комитеті материалдық құндылықтар қорынан азық-түлік, төсек-орын жабдықтары мен басқа да заттарды береді.