«Біріккен бітіреді, ұйымдасқан – ұтады»
Түркістан облысы кәсіпкерлер палатасы Өңірлік кеңесінің төрағасы Нұралы Әбішев облыстағы бизнес өкілдерін су тасқынынан зардап шеккен тұрғындарға қайырымдылық көрсетуге шақырды.
Бұл туралы Н.Әбішев өңір аумағындағы облыс орталығынан шалғай аймақтағы кәсіпкерлерге «Zoom» платформасы арқылы онлайн мәлімдеме жасады.
-Мемлекет басшысы Қасым-Жомарт Тоқаев халыққа арнаған Үндеуінде биылғы су тасқыны, көлемі жағынан соңғы 80 жылдан бергі ең ірі табиғи апат екенін атап өтті. Президент бір ел, бір халық болып жұмылып, бұл апатты міндетті түрде еңсеретінімізді, суға кеткен үйлер қалпына келтірілетінін, қиын-қыстау кезде бір жағадан бас, бір жеңнен қол шығару айрықша маңызды екенін жеткізді. Сондықтан осындай қиын кезеңде біз, «Біріккен бітіреді, ұйымдасқан – ұтады» демекші, бірлікті ту еткен ел екенімізді дәлелдеуге тиіспіз. Апат айтып келмейтіні рас. Сын сағатта жомарт жандардың да үнсіз қалмайтынын білеміз. Азаматтық танытып, қайырымдылық көрсетпеу олардың кісілігіне сын болмақ. Иә, бұл қиын қыстау күндерді де еңсереміз. Арқасына ауыр жүк түскен халықтың қайғысына ортақтасу әрбіріміздің парызымыз,
— деді Нұралы Әлмаханұлы.
Түркістан облысы кәсіпкерлер палатасы Өңірлік кеңесі зардап шеккендерге көмек көрсету мақсатында арнайы ұйымдастыру іс-шараларын шұғыл бастап кетті. Облыстық кәсіпкерлер палатасының директоры Асылан Ибадуллаевтің айтуынша, оңтүстік өңірдің кәсіпкерлері отандастарымызға қолдау білдіруге ат салысады.
Қазіргі таңда Түркістан облысының Іскер әйелдер кеңесі зардап шеккендерге 700 мың теңге жіберді, «Күшіміз бірлікте» қорына 340 мың теңге аударылды. Яғни елімізде орын алған төтенше жағдай кезінде кәсіпкерлер тарапынан тиісті қолдау бағытындағы жұмыстар өз жалғасын табады.
