«Таза өлке» акциясы аясында арыстық волонтерлер қарттарға құрмет көрсетіп, алғыс алып жүр. Арыс қалалық «Жастар ресурстық орталығы» коммуналдық мемлекеттік мекемесінің еріктілері мен №17 колледж волонтерлері еңбек ардагерлерінің мекен жайларына барып, әлеуметтік көмек көрсетті.
Қазақ елінің өсіп-өркендеуіне, еліміздің бейбіт өмір кешуіне өз үлестерін қосқан ардақты да аяулы қарттарымыздың өмір жолы, сіңірген еңбегі бүгінгі ұрпаққа үлгі-өнеге.
Колледж студенттерінен құралған волонтерлер Арыс қаласының құрметті азаматы, ақын, жасы сексенді алқымдаған Сабырхан Әлібекұлы мен Зәуре Оразбайқызының үйіне барып, аула жұмыстарын атқарды. Ақсақалдың хал-жағдайын сұрап, ақ батасын алған Арыс жастары Сабырхан ақсақалдың үйінің айналасындағы, қорасындағы шөптерді жұлып, тазартып, күл-қоқыстарын сыртқа шығарды.
Дәл осындай игі істен Арыс қаласына қарасты алты ауылдық округ жастары да тыс қалмай, ауылдағы тыл ардагерлерінің шаңырағында болып, үй шаруашылық жұмыстарына қолғабыс етті.
Дария көңілді қариялар үйіне келіп, шаруасын істеп, айналасын тазартып берген жастарға ақ батасын беріп, алғыстарын жаудырды.
«Қайырымдылық жасасаң қайырымын өзің көресің» дегенді нық ұстанған жастар «мақсатымыз — азаматтарды сауапты істерге тарта отырып, ізгілікті насихаттау» дейді.
Сол сияқты, «Таза өлке» акциясы шеберінде Түлкібас ауданында қоқыс-қалдықтарды шығару жұмыстары ауданның 15 ауылдық округінде жүргізілді. Акцияға белсенді волонтерлар мен жастардан құралған жалпы саны 450 адам қатысты. Тазалық жұмыстары барысында 30 тонна күл-қоқыс шығарылды. Сонымен қатар, жастар аудан тұрғындарын үй жайларын таза ұстап, тазалықты сақтап, көшет егу жұмыстарын бірлесе атқаруға шақырды.
