Түркістан қаласында үш отбасы баспаналы болып, қуанышқа кенелді. Қайырымдылық шарасы демеушілер есебінен жүргізілді. Қабырғасы қаланып, бой түзеген баспаналар әлеуметтік қолдауға аса мұқтаж деп танылған үш отбасына табысталды.
Әр үй 85 шаршы метрді құрайды, үш бөлмесі, асханасы және арнайы шомылу бөлмесімен қамтамасыз етілген. Электр желісіне, табиғи газ бен ауыз су жүйесіне қосылған.
Түрғындардың бұл қуанышына ортақтасқан облыс әкімі Дархан Сатыбалды мен қала әкімі Нұрбол Тұрашбеков отбасыларға ізгі тілек-ниеттерін білдірді.
Бұған дейін бұл тұрғындар баспанаға мұқтаж екенін айтып, облыс әкімінің қабылдауында болып, көмек сұраған болатын. Үйсіз-күйсіз жүрген тұрғындардың мәселесіне бей-жай қарамаған өңір әкімі демеушілер есебінен өтініштерін қанағаттандырыпты.
– Тұрғындарды баспанамен қамтамасыз ету – ең өзекті әрі маңызды мәселе. Түркістан облысында бұл бағытта ауқымды жұмыс жүріп жатыр. Шаңырақтарыңыз шаттыққа, жақсылыққа толсын. Шын жүректен құттықтаймын! – деді Дархан Сатыбалды.
Иә, ел ішінде қайырымды азаматтар аз емес. Әлеуметтік аз қамтамасыз етілген отбасылардың қазіргі таңда өз күшімен бір үй алуға шамасы келе бермейді. Осы себепті қайырымды халық өз қалталарынан жылу жинап, осындай отбасыларды қолдап, үй әперуге ниетті. Осындай азаматтар да халық арасынан шығып отыр. Көпшілікке қол салмай, өз қалтасынан шығындалып, бір отбасыны баспаналы етіп, алғысын алып отыр.
Баспана кілтін табыстау сәтінде баспаналы болған тұрғындар осы игі іске ұйытқы болған азаматтарға алғысын жаудырды.
Қазіргі таңда облыс орталығында үй кезегінде 17 мыңға жуық адам тіркелген. 2014 жылдан бері Түркістан қаласында кезек бойынша 3298 пәтер үлестірілсе, демеушілер есебінен 50-ге жуық баспана тарту етілген.
