Жұмыла көтерген жүк жеңіл

Табиғи апат аймағындағы зардап шеккен тұрғындарға гуманитарлық көмек Түркістан облысы «Жастар ресурстық орталығы» КММ-нің ғимаратында орналасқан штабта жинақталып белсенді жастар мен волонтерлар көмек керуенін су басқан өңірлерге жеткізу үшін жүк көлігіне арту жұмыстарын іске асыруда.
«Облыстағы ардагерлердің Үйлестіру кеңесі» қоғамдық бірлестігінің ардагерлері бір жағадан бас, бір жеңнен қол шығарып, облыстық штабқа азық-түлік, киім-кешек, көрпе-төсек, тұрмысқа қажетті заттардан құралған гуманитарлық көмек жеткізді.
-Бірнеше жыл бұрын өңірімізде орын алған төтенше жағдайда ел бірлігі мен нақты көмектерді көрдік. Жақсылыққа екі есе жақсылықпен қайыруға тырысатын халықпыз. Бұл қиындықта жеңіп шығамыз,- дейді қоғамдық бірлестік өкілдері.
Сондай-ақ, Түркістан облысы, Отырар, Қазығұрт ауданы, Қызылқия ауылы округіне қарасты Қызылсеңгір елді-мекені, Созақ ауданы Таукент ауылының тұрғындары мен Түркістан облысының прокуратурасы Батыс Қазақстан облысындағы табиғи су апаты аймағындағы зардап шеккен тұрғындарға көмек қолын созды. Сонымен қатар 500-ден астам ерікті жастар мен түрлі сала қызметкерлеріне Түркістан облысының атынан ыстық тамақтар берілді.
Орал тұрғындары қиын-қыстау кезеңде көмек көрсетіп, қолғабыс жасап өңірмен бірге екендіктерін білдірген Түркістан облысының халқына өз ризашылықтарын білдіріп, алғыстарын айтты.
Белсенділер алғашқы күннен бастап, гуманитарлық көмек пункттеріне облыстан жіберілген көмектерді орналастырып, қапшықтарды толтырып бөгеттер тұрғызу жұмыстарын жүргізіп жатыр.
Айта кетейік, табиғи апат аймағындағы зардап шеккен тұрғындарға көмек қолын созамын деген волонтерлер мен облыс тұрғындары Түркістан облысы «Жастар ресурстық орталығы» ғимаратында арнайы штабта белсенді жұмыс істеуде.