Түркістан облысы Созақ ауданының орталығында орналасқан А.Сүлейменов атындағы жалпы білім беретін мектеп «Қазақстан халқына» қоғамдық қорының «Ауылдық тірек мектептердің әлеуетін арттыру» жобасына еніп, материалдық-техникалық базасы қайта жаңартылды.
Аталған білім ордасына арнайы барған аудан әкімі Мұхит Тұрысбеков химия және биология, физика кабинеттері мен STEAM зертханасын, робототехника, АРТ студио, телестудия, интеллектум кабинеттерін, жоғары үлгіде жабдықталған акт және мәжіліс залымен танысты. Сондай-ақ телестудия кабинетінде мектеп оқушылары қойған сауалдарға жауап беріп, еркін тақырыпта пікір алмасты.
Жаңа жабдықтардың жай-жапсарымен толықтай танысқан аудан басшысы білім ордасындағы оқушылардың қабілеті мен ұстаздардың біліктілігі артып, жетістіктері еселене түсеріне сенім білдірді.
Жаңа жоба өткен жылдың 3 тамызында басталып, қаржы төлеуші «Қазақстан халқына» қоғамдық қоры, оператор «Білім беруді тұрақты дамыту» қоғамдық қоры, тауарды жеткізуші «EdTech Innovation» ЖШС-гі арасында өзара келісімшарт түзілді. Келісім шартта көрсетілген жаңа жабдықтар толығымен жеткізіліп, кезең-кезеңімен орнатылды. Орнату жұмыстары оқу үдерісіне кері әсер етпестей етіп оңтайландырылды.
Айта кетейік, 2022 жылғы 11 қаңтарда президент Қасым-Жомарт Тоқаев «Қазақстан халқына» қоғамдық әлеуметтік қорын құруды тапсырды.
“Қазақстан халқына” қорының негізгі мақсаты — қазақстандықтардың атаулы және жүйелі мәселелерін шешу. Сонымен бірге Қазақстан Республикасында қайырымдылықты жүйелі дамыту, қайырымдылық мәдениетін көтеру, қазақстандықтардың мәселесін шешу үшін мемлекет пен қордың мемлекеттік органдармен тығыз байланыста болуы. «Қазақстан халқына қоры» денсаулық сақтау, білім беру, әлеуметтік қолдау, спорт салаларына және төтенше жағдай салдарын жоюға мемлекеттік қолдау шараларынан бөлек көмек береді.
