ҚР Президенті Қасым-Жомарт Тоқаевтың тапсырмасына сәйкес, өткен жылы 21-35 жас аралығындағы азаматтарға 2,5 пайыздық шағын несие беру бағдарламасы іске қосылған еді. Тапсырма жас кәсіпкерлер арасында қалай орындалып жатыр? Осы мәселемен Түркістан облысы қоғамдық даму басқармасының «Жастар ресурстық орталығы» КММ-нің басшы орынбасары Есқұлов Пердебек Мақтаарал ауданына жұмыс сапарымен келді. Аудандық ішкі саясат бөлімінің басшысы Бабашев Мадияр және аудандық «Жастар ресурстық орталығы» КММ-нің басшысы Ошантаев Нұркен мемлекеттен 2,5 пайызбен несие алып кәсібін бастаған аудан жастарымен таныстырып, жұмыстарын баяндады.
Мемлекет қолдауын көрген жас кәсіпкердің бірі Арайлым Сейітжанова Атакент кентінде тұрады. Ол мемлекеттен жеңілдетілген несие алып, кент орталығынан «Арайлым» қыз-келіншектерге арналған фитнес клубын, «Megamix» түзете дамыту орталығын, ал биыл ағылшын тілін оқыту орталығын ашыпты. Бүгінде 25 жастағы кәсіпкер қыз 6 азаматты жұмыспен қамтып отыр.
-Қазір кәсіп бастаймын деген адамға мүмкіндік көп. Әсіресе, мемлекет тарапынан қолдау болып тұрғанда, бұл мүмкіндікті тиімді пайдаланып қалу керек. Барша кәсібін ашқысы келетін жастарға қорықпай кәсіптеріңізді ашыңыздар деген өз ізгі ниетімді жеткізгім келеді, — дейді Арайлым.
Арайлым сияқты кәсібін ашқан жастың бірі — Мұқағали Көшекеев. Ол Иіржар ауылдық округінен «Мұқағали» қожалығының жылыжай кешенінің жұмысын жүргізіп отыр. Қожалық иесі Мұқағали Көшекеев 2,5 пайызбен 5 миллион теңге несие алып, жылыжай кәсібін жолға қойыпты. Қазіргі таңда жылыжайда болгар бұрышы өсірілуде. Аса қатты күтімді талап етпейтін, қырық күнде өнім беретін көкөністі базар нарығында жақсы саудалауға болады екен. Бүгінде қожалық иесі ауыл жастарына да жұмыс тауып беріп отыр.