Қазақстан азаматтығын алған шетелдіктің қуанышы қойнына сыймай, еліміздің әнұранын орындап, ерекше тәсілмен эмоциясын білдірді, деп хабарлайды Azattyq Rýhy.
Қырғызстан азаматы Нұрлан Джумабек уулу бала кезінен Қазақстанда тұрады. Ол Қырғызстан азаматтығынан бас тарту және еліміздің азаматы болу туралы шешім қабылдап, Қарағанды қаласының Полиция басқармасы Октябрь полиция бөлімінің көші-қон қызметіне құжаттарын тапсырған. Нұрлан нәтижені асыға күтті.
«Көші-қон қызметкерлері оның Қазақстан Республикасының азаматтығына қабылданғаны туралы айтқанда қуанышында шек болған жоқ. Ол өзінің Отанына айналған елдің Әнұранын толқыныспен орындады. Осылайша, ол өзіне жоғары сенім білдірген мемлекетке ризашылығын жеткізді.
Өз кезегінде Нұрлан тәртіп сақшыларын Қазақстан Республикасының Конституциясы мен заңдарын сақтауға, Қазақстан халықтарының дәстүрлері мен мәдениетін құрметтейтін азаматтардың бірі болатынына сөз берді», — дейді Қарағанды облыстық Полиция департаментінің баспасөз қызметі.
