«Атырау – Алматы» бағытындағы №42 жолаушылар пойызы Шымкент станциясынан қозғала бергенде мас күйдегі үш жасөспірім вагонға жармасып алып, апатты жағдай тудырған, деп хабарлайды Azattyq Rýhy.
«Қазақстан Темір жолы» компаниясының баспасөз қызметі олардың видеосын көрсетіп, оқиғаны баяндап берген.
«Атырау – Алматы» бағытындағы №42 жолаушылар пойызы жүргелі тұрғанда үш жасөспірім мас күйінде соңғы вагонға жармасып, мініп алуға әрекет етті. Бұның арты ауыр қайғылы жағдайға әкеп соқтыруы мүмкін еді. Оқиғаны Шымкент магистральдық желі бөлімшесіне қарасты вокзалдың кезекшісі Мейірбек Керімбеков дер кезінде байқап, бірден станция кезекшісі мен желілік полиция қызметкерлеріне хабар берген», — деп жазады ҚТЖ өз ақпаратында.
Осылайша вокзал қызметкерлері мен полиция тез әрекет етіп, пойызды тоқтатып, жасөспірімдерді ұстап алған.
«Полиция жасөспірімдерді бөлімшеге апарды. Олардың жеке тұлғалары анықталды, қолданыстағы заңнамаға сәйкес тиісті шаралар қабылданып жатыр. Оқиға салдарынан пойыз бес минутқа кеш қозғалып, жолаушылар сағат 01:28-де жолға шықты», — деп хабарлайжы ҚТЖ.
