Өзбекстан Діни басқармасының пәтуа орталығы діни сұрақтардың жауабын ChatGPT-ден сұрамау керек деген пәтуа шығарды. Өйткені, бұл адам ойлап тапқан қосымша болғандықтан, кейде қате жауап береді, деп хабарлайды Azattyq Rýhy.
Діни басқарма «діни сұрақтарға чат-боттар арқылы жауап алып, соның ақыл-кеңесіне сүйенсек бола ма?» деген адамның сұрағына жауап бере отырып, осындай пәтуа шығарыпты.
«Әрине, ChatGPT платформасы кейбір салаларда адамдарға пайдасын тигізіп жатады. Бірақ, ол діни сұрақтарға дұрыс жауап бере алмайды, өйткені, оны адам ойлап тапқан», — деп мәлімдеген Өзбекстанның діни басқармасы.
Тіпті, Пәтуа орталығының мамандары ChatGPT кейбір сұрақтарға мүлде теріс жауап беріп, қате дереккөздерге сілтеме береді екен.
«Сондықтан, шариғатқа қатысты сұрақтарды тек теолог ғалымдар мен арнайы мамандардан сұрау керек», — деп жазылған пәтуада.
Жуырда дүние жүзінде ChatGPT жұмысында ақау шықты
Соңғы жылдары аса танымал болған ChatGPT чат-ботының жұмысында ақау пайда болды. 10 маусым күні таңертеңнен бері әлемдегі қолданушылар нейрондық желіден сұраулар жібере алмайтынын немесе жауап ала алмайтынын айтқан еді. Downdetector порталы ChatGPT проблемасы туралы есеп күрт өскенін тіркеді. Оның деректері бойынша, барлық тіркелген оқиғалардың 90%-ға жуығы қызметтің негізгі бөлігі – жауаптарды қалыптастырудың бұзылуына тікелей байланысты.
OpenAI ресми сайты ақау болғанын растады.
«Біз проблеманың пайда болғаны туралы білеміз және оны шешу үшін белсенді жұмыс істеп жатырмыз», — делінген пайдаланушыларға арналған хабарламада.
Қызметтің жаппай істен шығу себебі әзірге белгісіз.
