Атырау мұнай өңдеу зауытына (МӨЗ) қатысты жоспардан тыс тексеру басталады. Бұл туралы Экология және табиғи ресурстар министрлігінің Экологиялық реттеу және бақылау комитеті мәлімдеді.
Комитеттің хабарлауынша, 25 қаңтар күні Атырау облысының экология департаментіне зауытқа жақын орналасқан Алғабас және Сая елді мекендерінің тұрғындарынан шағымдар түскен. Тұрғындар ауада күкірттің өткір иісі сезілетінін айтқан.
Осыған байланысты департаменттің зертханалық-талдамалық бөлімінің мамандары ауа сынамаларын алды. Сонымен қатар мониторингті «Қазгидромет» мекемесінің жергілікті филиалы да жүргізді.
Зерттеу нәтижесінде Атырау қаласының бірнеше ауданында ауадағы ластаушы заттардың — күкіртсутек пен көміртек тотығының шекті рұқсат етілген мөлшерден асып кеткені анықталды.
Ең жоғары көрсеткіштер мына аумақтарда тіркелді:
- Тасқала ауылында — 17,5 есе;
- Химпосёлок ауданында — 36 есе;
- Тасқала ауылына жақын аумақта — 15 есе.
Аталған аумақтар Атырау мұнай өңдеу зауытына тікелей жақын орналасқан. Ауа сынамалары алынған сәтте жел солтүстік-шығыс бағытта соғып, ылғалдылық деңгейі жоғары болған. Бұл жағымсыз иістің тұрғын аймақтарға таралуына әсер етуі мүмкін.
Комитет өкілдерінің айтуынша, қазіргі уақытта Атырау мұнай өңдеу зауытына қатысты жоспардан тыс тексеру ашу бойынша жұмыстар жүргізіліп жатыр. Қабылданатын шаралар туралы қосымша ақпарат кейінірек хабарланатын болады.
Айта кетейік, бұған дейін Атырау тұрғындары қаланы жайлаған жағымсыз иіске шағымданған болатын. Әлеуметтік желілерде қала тұрғындары бас ауруы мен денсаулықтың нашарлағанын да жазып жатыр.
