Павлодар қаласында дәрігерлер зейнеткер әйелді қайта тірілтті. Оның жүрегі үш минут бойы соқпай қалған.
Оқиға 25 қаңтар күні қарттарға арналған жергілікті пансионатта болған. Ас ішу кезінде мекеме тұрғындарының бірі кенеттен тұншыға бастаған — тамақтың бір бөлігі оның тыныс алу жолын жауып қалған.
Пансионат қызметкерлері бірден жедел жәрдем шақырған. Жедел жәрдем бригадасы оқиға орнына үш минут ішінде жеткен. Сол сәтте әйел клиникалық өлім жағдайында болғаны Павлодар облыстық жедел жәрдем станциясының Instagram желісіндегі ресми парақшасында хабарланды.
«Медициналық қызметкерлер науқастың тыныс алу жолдарын дереу босатып, реанимациялық шараларды бастады», — делінген хабарламада.
Зейнеткер әйелді өмірге қайта әкелгеннен кейін ол жасанды тыныс алу аппаратына қосылып, шұғыл түрде №1 қалалық ауруханаға жеткізілді.
Екі күннен соң науқас жансақтау бөлімінен жалпы палатаға ауыстырылды. Қазіргі таңда әйел дәрігерлердің бақылауында, жағдайы жақсарып келеді.
