Астана қаласында ұйымдасқан қылмыстық топты құру және оның қызметіне қатысу фактісі бойынша қылмыстық іс қаралды. Сот материалдарына сәйкес, бұл топ 2020–2023 жылдар аралығында Қазақстан аумағында заңсыз көші-қонмен айналысқан.
Қазақстандық әйел басқарған ҰҚТ
Іс бойынша анықталғандай, азаматша Б. Түркия азаматтарын Қазақстанға заңсыз көшіру мақсатында қылмыстық топ ұйымдастырған. Қылмыстық әрекетке оның таныстары тартылған. Олардың қатарында Түркия азаматтары Ю., К., К., Қазақстан азаматтары М., Х., М., сондай-ақ Алматы қаласының көші-қон қызметінің қызметкері С. болған.
Топ Б.-ның басшылығымен тұрақты ұйымдасқан қылмыстық бірлестік ретінде жұмыс істеген. Қатысушылар Түркия азаматтарына С-3 санатындағы еңбек визаларын заңсыз рәсімдеп отырған. Бұл үшін олар жалған құжаттарды және шетел азаматтарының хабарынсыз электрондық цифрлық қолтаңбалардың (ЭЦҚ) кілттерін пайдаланған.
Қылмыстық схема аясында шетел азаматтарының үлесі бар ондаған жауапкершілігі шектеулі серіктестік (ТОО) тіркелген. Сонымен қатар, заңсыз жолмен ақша қаражаттары алынған және визаларды рәсімдеуге арналған құжаттар дайындалған.
Тараптардың ұстанымы
Прокурор айыптауды қолдап, келесі жазаларды сұрады:
- Б. — мүлкін тәркілей отырып, 9 жылға бас бостандығынан айыру;
- С. — мүлкін тәркілей отырып, 9 жылға бас бостандығынан айыру;
- М., М., Х., К., Ю. — әрқайсысына 6 жылдан бас бостандығынан айыру.
Айыпталушылардың қорғаушылары қылмыс құрамы жоқ екенін алға тартып, ақтауды сұраған. Алайда сотта айыпталушылардың кінәсі куәгерлердің көрсетулерімен, WhatsApp мессенджеріндегі хат-хабарлармен, СОРМ материалдарымен, телефон қоңырауларымен, банк үзінділерімен, тінту хаттамаларымен және басқа да дәлелдермен толық дәлелденді.
Сот шешімі
Астананың қылмыстық істер жөніндегі мамандандырылған ауданаралық соты азаматша Б.-ны кінәлі деп танып, мүлкін тәркілей отырып, 10 жылға бас бостандығынан айырды.
Қылмыстық топтың басқа мүшелеріне мынадай жазалар тағайындалды:
- С. — 9 жылға бас бостандығынан айыру;
- Х., М., М., К., Ю. — әрқайсысына 7 жылдан;
- К. кінәлі деп танылғанымен, ҚР Конституциясының 30 жылдығына байланысты қабылданған «Амнистия туралы» заң аясында жазадан босатылды.
Сот үкімі заңды күшіне енген жоқ.
Еске салайық, бұған дейін Семей қаласында ұйымдасқан қылмыстық топқа қатысып, құны 4 миллиард теңгеден асатын алтын құрамды кенді ұрлағаны үшін үш тұрғынға үкім шыққан болатын.
