Не болды
Сарысу ауданы әкімдігінің Instagram-парақшасында тұрғындарға арналған үндеу жарияланды.
«6 ақпанда байқалған қатты желге байланысты қалада кейбір көпқабатты тұрғын үйлердің шатырлары ұшып кеткен жағдайлар тіркелді. Қауіпсіздікті қамтамасыз ету мақсатында аса қажет болмаса, көшеге шықпауларыңызды және қала аумағында қозғалу кезінде сақ болуларыңызды сұраймыз», — делінген аудан әкімдігінің хабарламасында.
Сондай-ақ қала мектептерінде таңғы ауысымда өтетін сабақтар қашықтан форматта ұйымдастырылатыны хабарланды.
Әлеуметтік желілерде қолайсыз ауа райының салдары бейнеленген видеолар пайда болды. Бейнежазба авторлары түсірілім 6 ақпанда Жаңатас қаласында жүргізілгенін айтады.
Осындай видеолардың бірінің астында Сарысу ауданының әкімдігі 2026 жылғы 6 ақпанда қатты жел салдарынан тұрғын үйлердің шатырлары, кәсіпкерлік нысандары және электр беру желілері зақымданғанын растады. Ауданда бір ауысымда оқитын 15 мектеп қашықтан оқыту форматына көшірілген. Әкімдіктің мәліметінше, зардап шеккендер жоқ.
Әкімдік деректеріне сәйкес, коммуналдық жүйелер қалыпты режимде жұмыс істеуде. Қазіргі уақытта мамандар зақымданған нысандарды тексеру жұмыстарын жүргізіп жатыр.
