Жоғарғы соттың түсіндіруінше, апелляцияның аталған қаулысы Қылмыстық-процестік кодекстің 484-бабы 2-бөлігіне сәйкес қайта қарауға жатпайды. Аталған норма апелляциялық шешімдердің қайсысы кассациялық тәртіпте қаралатынын, ал қайсысы қаралмайтынын нақты айқындайды.
Сотта сондай-ақ Ертаевтың шартты түрде мерзімінен бұрын босату туралы өтініші тіркелмегені айтылды.
Қылмыстық-атқару жүйесі комитеті (ҚАЖК) Ертаевтың сот үкіміне сәйкес жазасын өтеп жатқанын хабарлады. Жазасын өтеу орны туралы ақпарат туыстарына жеткізілетіні, ал жеке іс материалдары дербес деректер туралы заңға сәйкес жария етілмейтіні атап өтілді.
Ертаевтың ісі
2020 жылдың қарашасында Жомарт Ертаев Bank RBK банкінен 144 млрд теңге жымқырды деген айыппен 11 жылға сотталған. Кейін жаза мерзімі 9 жылға қысқартылған.
Кейінірек ол Qazaq Banki және Еуразиялық банк қатысы бар тағы бір қылмыстық іс бойынша кінәлі деп танылды. Сот шешімімен банктерге ондаған миллиард теңге өндіріп алу міндеттелген.
2025 жылдың қыркүйегінде Конституцияның 30 жылдығына байланысты амнистия қолданылып, Ертаев босатылған еді. Алайда апелляциялық сот бірінші инстанцияның шешімінде есептеу мен мерзімдерге қатысты қателіктер жіберілгенін анықтап, амнистияны жою туралы шешім қабылдады. Соның нәтижесінде ол қайтадан қамауға алынды.
