Президенттің айтуынша, шешім қабылдар алдында ол Ташиевке қоңырау шалып, қалыптасқан жағдайды түсіндірген.
«Мен досыма не болып жатқанын айтып, оны қызметінен босататынымды ескерттім. Содан кейін ғана шешім қабылдадым», — деді Жапаров «Кабар» агенттігіне берген сұхбатында.
Мемлекет басшысы бұл қадам арқылы керісінше досын қорғағанын атап өтті. Оның сөзінше, Ташиевтің айналасындағы кейбір адамдар оның атын пайдаланып, түрлі мемлекеттік қызметкерлер мен депутаттарға «генерал жағына өтіңдер» деген мазмұнда үндеулер жасаған.
Жапаров мұндай әрекеттер мемлекеттік аппарат ішінде жікке бөлінуге және қоғамда қарсыластыққа алып келуі мүмкін екенін айтты.
«Сондықтан мен үшін елдегі тұрақтылық бәрінен жоғары. Осы себепті досымды қызметінен босатуға мәжбүр болдым», — деді ол.
Еске сала кетейік, 10 ақпанда Камчыбек Ташиев аталған қызметінен босатылғаны белгілі болды. Кейін ол денсаулығына байланысты шетелге шыққанын хабарлаған. Ташиев шешім өзі үшін күтпеген болғанын, бірақ президент шешімін орындау қажет екенін мәлімдеді.
