Алматыда «Әділетті және Прогрессивті Қазақстанның Халықтық Конституциясы үшін!» Жалпыұлттық коалициясы өкілдерінің жұртшылықпен кездесулер сериясы жалғасуда. Кездесулер барысында жаңа Конституция жобасының негізгі ережелері мен алдағы республикалық референдумның маңызы талқылануда.
Кезекті кездесу қаладағы кәсіподақ ұйымдарының жетекшілерімен өтті. Ашық диалог форматында қатысушылар қоғамдық даму мен әлеуметтік саясат мәселелерін, сондай-ақ Негізгі заң жобасының басты ережелерін талқылады.
ҚР Парламенті Сенатының депутаты Нурия Ниязова Конституция жобасын мазмұнды талқылаудың маңыздылығын атап өтті.
— Декларативтілік пен формалды тәсілге жол бермей, мазмұнды талқылау жүргізу аса маңызды. Конституция — қоғамдық үдерістерді бейнелейтін және мемлекеттің даму бағытын айқындайтын базалық құжат, — деді ол.
Кездесу қорытындысы бойынша кәсіподақ ұйымдарының өкілдері алдағы референдумды қолдайтындықтарын білдірді.
Сондай-ақ сенатор Сұлтанбек Мәкажанов Алматы қаласының Белсенді ұзақ өмір сүру орталығының өкілдерімен кездесті. Кездесу барысында тараптар жаңа Конституция жобасы мен алдағы дауыс беруге азаматтардың қатысуының маңызы жөнінде пікір алмасты.
— Әр тарихи кезеңде елдің жаңа бағдарлары қалыптасады. Біздің таңдауымыз бен азаматтық белсенділігіміз балаларымыз бен немерелеріміздің лайықты болашағына негіз болады, — деді сенатор.
Аға буын өкілдері референдумның маңыздылығын атап өтіп, алдағы конституциялық өзгерістерді қолдайтындықтарын жеткізді.
Сонымен қатар қалада сенаторлар тобының Алматы қалалық мәслихаты депутаттарының қатысуымен AMANAT партиясы қалалық филиалы жанындағы әйелдер қанатының белсенділерімен кездесуі өтті. Қатысушылар жаңа Конституция жобасының негізгі ережелерін, сондай-ақ әйелдердің қоғамның қоғамдық-саяси өміріндегі рөлін талқылады.
Нурия Ниязова Негізгі заңды жаңарту қоғамның қазіргі сын-қатерлері мен сұраныстарын ескеретінін атап өтті.
— 1995 жылғы Конституция тәуелсіздіктің негізін қалап, маңызды рөл атқарды. Алайда бүгінгі қоғам ірі өзгерістер дәуірінде өмір сүріп жатыр — геосаяси жағдай өзгеруде, ал технологиялық прогресс өмірдің барлық саласына әсер етуде. Сондықтан жаңа Конституция — бұл елдің одан әрі дамуының жаңа логикасын қалыптастыру, — деді депутат.
Кездесуге қатысушылар референдум өткізуді қолдап, мемлекеттік бастамаларды талқылауға азаматтардың белсенді қатысуының маңыздылығын атап өтті.
Еске сала кетейік, Мемлекет басшысының Жарлығына сәйкес Қазақстанда 15 наурыз күні жаңа Конституцияны қабылдау жөнінде республикалық референдум өткізу жоспарланған.
