Жедел ақпарат негізінде облыстық полицияның есірткі қылмысына қарсы күрес бөлімінің қызметкерлері арнайы операция ұйымдастырған. Іс-шара барысында қала маңындағы Еркін ауылында тұратын 62 жастағы азамат күдікке ілініп, ұсталды. Тергеу аясында полицейлер бақылау сатып алу әдісін қолданып, күдіктіден аз мөлшерде – шамамен 5 грамм гашиш сатып алған.
Одан кейін жүргізілген тінту жұмыстары кезінде күдіктінің үйінен өсімдік тектес, өзіне тән иісі бар зат салынған бірнеше полиэтилен пакет табылды. Ал ауладағы шаруашылық құрылыстарын тексеру барысында скотчпен оралған ірі қара пакет анықталып, оның ішінен жалпы салмағы 5 келіден асатын есірткі заты тәркіленген. Алдын ала сараптама нәтижелері бойынша бұл зат гашиш екені белгілі болды.
Қазіргі таңда аталған дерек бойынша қылмыстық іс қозғалып, сотқа дейінгі тергеу амалдары жалғасуда. Күдіктіге қатысты сот шешімімен денсаулық жағдайын ескере отырып, үйқамақ түріндегі бұлтартпау шарасы белгіленді. Тергеу барысында есірткінің жеткізу арналары, байланыстары мен ықтимал сыбайластары да анықталуы мүмкін.
Полиция өкілдерінің айтуынша, заңсыз есірткі айналымына қарсы күрес – құқық қорғау органдарының негізгі басымдықтарының бірі. Соңғы жылдары өңірде мұндай қылмыстарды анықтау үшін жедел-іздестіру жұмыстары күшейтіліп, заманауи тәсілдер мен цифрлық бақылау құралдары кеңінен қолданылып келеді.
Қазақстан заңнамасына сәйкес, есірткі заттарын өткізу мақсатында заңсыз сақтау, тасымалдау немесе сату ауыр қылмыс санатына жатады. Мұндай әрекеттер үшін кінәлі тұлғалар мүлкі тәркіленіп, 7 жылдан 12 жылға дейін бас бостандығынан айырылуы мүмкін.
