Астанада өткен «Geoscience & Exploration Central Asia» халықаралық геологиялық форумы аясында «ҚазМұнайГаз» ұлттық компаниясы мен BP Exploration Operating Company Limited (British Petroleum) арасында геологиялық барлау саласындағы ынтымақтастық туралы ниет келісіміне қол қойылды.
Келісімге сәйкес, тараптар Маңғыстау облысындағы болашағы зор Үстірт блогын бірлесіп зерттеп, оны игеру мүмкіндіктерін қарастырады. Бұл жоба Қазақстанның мұнай-газ саласындағы жаңа перспективалы бағыттардың бірі ретінде бағаланып отыр.
Құжатқа қол қою екіжақты әріптестіктің жаңа кезеңін бастайды. Сарапшылардың пікірінше, серіктестіктің қайта жандануы геологиялық барлау жұмыстарын кеңейтуге жол ашып, елдің ресурстық базасын нығайтуға ықпал етеді.
Айта кетейік, British Petroleum компаниясы Қазақстанда 2009 жылдан бері жұмыс істемеген. Ол кезде компания Қарашығанақ және Каспий құбыр консорциумы жобаларынан шыққан болатын. 2019 жылы BP Қазақстан нарығына қайта оралу мүмкіндігін қарастырғанымен, мұнай бағасының құбылуы мен пандемия жағдайына байланысты бұл жоспар жүзеге аспады.
Қазіргі келісім BP-дің Қазақстанға қайта оралуына бағытталған алғашқы нақты қадамдардың бірі болуы мүмкін.
