Қазақстан Республикасының Бас прокуратурасы Санжар Боқаев ісіне қатысты жаңа мәліметтерді жариялады. Ведомство өкілдерінің хабарлауынша, ол ірі көлемдегі қаржы жымқыру және ағаштарды заңсыз кесу фактілері бойынша күдікке ілінген.
Сенатта өткен брифинг барысында Бас прокурордың орынбасары Ерлан Өтегенов аталған іске қатысты түсініктеме берді. Оның айтуынша, Боқаев алаяқтық жолмен аса ірі көлемде қаражат жымқырды деген күдікке ілінген.
«Ол ірі көлемдегі қаржы жымқыру және алдын ала сөз байласу арқылы ағаштарды заңсыз кесуді ұйымдастыру баптары бойынша күдікті», — деді Өтегенов.
Журналистер күдікті әрекеттердің қай кезеңде және қай қызметте болғанын нақтылаған кезде, Бас прокуратура өкілі бұл құқықбұзушылықтар Боқаевтың ұлттық компанияда жұмыс істеген уақытында орын алуы мүмкін екенін атап өтті. Дегенмен, нақты мәліметтер тергеу аяқталғаннан кейін жария етілетіні айтылды.
Қазіргі таңда Санжар Боқаев екі ай мерзімге қамауға алынған. Оған қатысты қылмыстық іс Қазақстан Республикасы Қылмыстық кодексінің 190-бабы 4-бөлігі 2-тармағы («Аса ірі көлемдегі алаяқтық») және 340-бабы 3-бөлігі 1-тармағы («Ағаштар мен бұталарды заңсыз кесу, жою немесе бүлдіру, алдын ала сөз байласқан адамдар тобы арқылы») бойынша тергелуде.
Бас прокуратура істің барлық мән-жайы тергеу аяқталған соң толық жарияланатынын мәлімдеді.
