Оның айтуынша, депутаттық сауалдан кейін қазақстандық шенеуніктердің аталған материалдарға қатысы бар-жоғы тексерілуде. Тергеу аясында қаралып жатқан деректер көлемі өте үлкен — шамамен 3 миллион хабарламадан тұрады және олардың көпшілігі үзік-үзік сипатта.
«Қазіргі уақытта біз деректерді толық зерттеп жатырмыз: олардың ішінде Қазақстан азаматтары қай жерде аталады, жалпы Қазақстанға қатысты қандай мәліметтер бар — соның бәрі тексерілуде», — деді Утегенов.
Журналистердің нақты шенеуніктердің қатысы анықталды ма және тексеру қанша уақытқа созылады деген сұрақтарына ол әзірге нақты жауап бермеді. Оның сөзінше, ақпараттың ауқымы кең болғандықтан, барлық деректі мұқият саралап, олардың шынайылығын тексеру қажет.
Еске салайық, 2026 жылғы 25 ақпанда Мәжіліс депутаттары арнайы қызметтерге «Эпштейн тізімінде» болуы мүмкін барлық қазақстандық шенеуніктерді тексеруді тапсырған болатын.
