Шымкент қаласы Абай ауданы жастар ресурстық орталығының ұйымдастыруымен «Birgemiz Asylmura» жобасы аясында аудан жастары Шымкент қаласы Полиция департаментінің мұражайына экскурсия жасады. Мақсаты – болашақ жасөспірімдерге қаламыздағы белгілі орындар мен тарихи мекендерді кеңінен насихаттау.
Экскурсия барысында музейдің меңгерушісі жастарды полицияның қалыптасу тарихы, Ұлы Отан соғысының батырлары және ішкі істер органдарының ардагерлері туралы мәліметтермен таныстырды. Сонымен қатар, мұражай меңгерушісі келушілерге қызмет бабында қаза тапқан полиция қызметкерлерінің ерліктері туралы баяндап берді.
Сонымен қатар, Шымкент қаласындағы «Достық үйі» ғимаратында Ы.Алтынсарин атындағы №65 мектеп-гимназиясының оқушыларымен ынтымақтастыққа бағытталған жиын өткізілді. Жиыннан соң қатысушылар ғимараттағы қалалық 17 этномәдени бірлестіктердің мұражайымен танысты. Әрбір этностың тарихи мұраларынан мол мағлұматтар алып, өзара ой бөлісті.
Жастар этномәдени бірлестіктер шығармашылық ұжымдарының концерттік қызметін белсенді түрде жүзеге асыруға, қала тұрғындарының өңірдегі сан алуан этнос өкілдерінің мәдениетімен етене танысуына мүмкіндік беретін 800 орындық залды аралап, тамсанып қайтты.
Шет елге қоныс аударған Штаки отбасын Шымкенттің шырайы қуантты. Бұл туралы 1990 жылдары Германияға қоныс аударған Штаки отбасы айтты. Шымкентке қыдырып келіп, шаһардың көрікті орындарында болған Штаки отбасы бүгін қаладағы «Достық» үйі ғимаратының тыныс-тіршілігімен танысты.
Кезінде «Қазақстан» кинотеатрында танысып, кейіннен шаңырақ көтергенін жеткізген Штаки отбасы өздерінің жастық шағы өткен шуақты шаһардағы бұл ғимараттың тоқырау жылдардың сынынан аман өтіп, заман талабына сай жаңғырғанына қуанышты екенін жеткізді.
«Достық» үйін аралап, этномұражай мен кезінде өздері танысқан залдағы орындықтарға отырып көрген Штаки отбасы жастық шағын еске алып, ерекше көңіл-күй сыйлаған орынның аурасына тамсанды.
Бүгінде Германияның Люнебург қаласында тұратын Штаки отбасы бұрын Шымкент облысының (бұрынғы Оңтүстік Қазақстан облысы, қазіргі Түркістан облысы) Қазығұрт және Шарапхана елді мекендерінде тұрғанын атап өтіп, Орта Азия елдеріне жасаған саяхаты аясында Шымкентке соғып, осындағы достарымен және кластастарымен кездесуге келгенін де айтып өтті.
