Жастар ресурстық орталығының ұйымдастыруымен «Жастар арасындағы АИТВ/ЖИТС–тің алдын алу» тақырыбында Сайрам медициналық колледжі мен Орта Азиялық медициналық колледжі жастары арасында кездесу өтті. Мақсаты — адамзат өміріне қауіп төңдіріп отырған қатерлі АИТВ/ЖИТС дертін алдын алу және салауатты өмір салтын қалыптастыру.
Кездесуде ЖИТС-тің алдын алу және оған қарсы күрес жөніндегі орталық маманы Жүргенбаева Назира, Шымкент қаласы Психикалық денсаулық сақтау орталығының нарколог дәрігері Арынтаева Бағила және Серғали Түркістан Аймақтық қоғамдық бірлестігінің жоба үйлестірушісі Абуталиев Ержан қатысты.
Біздің елімізде АИТВ жұқтырудың алғашқы оқиғалары 1987 жылы тіркеле бастаған. Бүгінде Республикада АИТВ-мен 28 мыңға жуық адам тұрады. АИТВ инфекциясы таралуының ең жоғары көрсеткіштері Павлодар, Қарағанды, СҚО, ШҚО және Қостанай облыстарында тіркелген. Ең төменгі көрсеткіштер Қызылорда облысында байқалады. АИТВ статусын арнайы тест тапсыру арқылы ғана білуге болады. Әрбір адам тұрғылықты жері бойынша емханада немесе ЖИТС орталығында АИТВ-ға тесттен тегін өте алады.
Кездеуде инфекцияның таралу жолдары сөз болды. АИТВ үш жолмен беріледі: жыныстық қатынас арқылы, жұқтырған адамның қаны арқылы (мысалы, тіс щеткаларын, қырыну және маникюр құралдарын ортақ пайдалану, татуировка және пирсинг жасатқанда көктамырішілік препараттарды қолдану кезінде) немесе жұқтырған анадан балаға, жүктілік, босану және емізу кезінде. Жоғарыда аталғандардан басқа АҚТҚ-ның берілу жолдары жоқ. Сондықтан ВИЧ індетін жұқтырған адаммен араласуға және дос болуға әбден болады.
АИТВ/ЖИТС бойынша БҰҰ-ның бірлескен бағдарламасы — ЮНЭЙДС-тің бастамасымен 1 наурыз «Кемсітушілікке жол жоқ» күні ретінде белгіленді. Ондағы мақсат қоғамда кемсітушілікті түп тамырымен жою қажеттілігіне көңіл аударту. Мәселен, көптеген елдерде дискриминациялық заңдардың кесірінен, адамдар құқықтық теңсіздікке ұшырап негізгі қызметтерге қол жеткізе алмауда. Мұндай заңдар адамның құқығы мен еркіндігіне шектеу болып табылады. Мысалы қазіргі таңда әлемнің 20 — дан астам елінде АИТВ жұқпасы бар адамдардың еркін жүріп тұруына шектеулер әлі де жалғасуда. Ал, көптеген мемлекеттерде АИТВ жұқпасы бар әрбір бесінші адам медициналық көмекке жүгіне алмауда. Осындай көптеген келеңсіздіктердің алдын алу мақсатында БҰҰ-ның 2014 жылғы 1 наурыздағы шешімімен “Кемсітушілікке жол жоқ” деп аталатын жаңа дата қабылданды.
Жиын соңында сала маманы жаман әдеттерден аулақ болып, салауатты өмір салтын ұстануға шақырды.
2000 символ