Шымкент қаласының әкімі Ғабит Сыздықбеков сүтті мал шаруашылығын дамыту арқылы сүт өнімдерін көбейту мақсатында ұйымдастырылған семинарға қатысты.
Семинар барысында қала басшысы ауыл шаруашылығы еңбеккерлерін кәсіби мерекелерімен құттықтап, халықты агроөнімдермен қамтып отырған шаруаларға алғысын білдірді.
«Ауыл шаруашылығы кәсібімен айналысамын деген кәсіпкерлерге мемлекет тарапынан жеңілдетілген несие мен инвестиция, қайта өңдеу, егіншілік, мал шаруашылығы бағыттарында субсидиялау арқылы қолдау көрсетіледі. Осындай мүмкіндіктерді пайдаланып, саланы ары қарай дамытуға, қала халқын сапалы ауыл шаруашылығы өнімдерімен қамтамасыз етуге және де өнімдердің экспортын арттыруға шақырамын», – деді қала әкімі.
Жиында кәсіпкерлер мен жеке қосалқы шаруашылық иелері кластерлік жобаларды дамыту арқылы халықтың табысын арттыру тетіктерін қарастырды. Сондай-ақ шет елдерден әкелінген сүтті және сүтті-етті ірі қара малдың күтімі, сүтті мал шаруашылығын дамыту тақырыптарында пікір алмасты. Семинар аясында мал шаруашылығы өнімдері мен құрал жабдықтар көрмесі ұйымдастырылды. Сонымен бірге агроөнеркәсіп кешенін дамыту мақсатында атқарылған жұмыстарға ақпараттық қолдау көрсеткен бұқаралық ақпарат құралдарының өкілдері де құрметке бөленді.
Айта кетейік, қала аумағындағы егістік көлемі 30,1 мың гектарға жетті. Ал 81 елді мекенде 157 мыңға жуық мал басы және 50-ге жуық түрлі қайта өңдеуші кәсіпорын бар. Қазіргі таңда 3 мыңнан аса шаруа қожалығы және 86 ауыл шаруашылығы кооперативі жұмыс істейді. Сонымен қатар, ауыл шаруашылығы өнімдерін қайта өңдейтін «Бозарық» тамақ өнеркәсібі индустриялық аймағы құрылып, бүгінде инфрақұрылым тарту жұмыстары жүргізілуде.
Қала аумағында ауыл шаруашылығы өнімдерін қайта өңдеуші 50-ден астам (кәсіпорындпрдың негізгі бағыттары: ұн-12, макарон-1, ірімшік-8, сары май-3, айран-3, жұжық-4, консерва-5, шұжық-6 т.б.) кәсіпорындары жұмыс жасауда. Оның ішінде сүтті қайта өндеумен айналысатын 8 кәсіпорын жұмыс жасауда («INTERMILK KAZAKHSTAN» ЖШС, «ОҢТҮСТІК AGRO LTD» ЖШС, «GOLDEN CHEESE» ЖШС, «BIO FOOD KZ» ЖШС, «IZMIR TRADE» ЖШС, «Бәйтерек Агро» СПК, «Дони LTD» ЖШС және ЖК Нурсултан). Олар бүгінгі күнге дейін 50 мың тонна сүтті қайта өндеп, 500 тонна сары май, 3 000 тонна қатты ірімшік өндіріп жатыр.
2000 символ
