Этносаралық, әлеуметтік қақтығыстардың алдын алу, негізгі бағыттар бойынша өңірлердегі мәселелерді анықтау, нақтылау және оларды шешу мақсатында ҚРАқпарат және қоғамдық даму министрлігі тарапынан «Бейбітшілік және келісім» жобасы басталған. Жоба шеңберінде Шымкент қаласы әкімдігі жанынан жұмыс тобы құрылған болатын.
Бүгін осы жоба аясында Тұран ауданы, Карл Маркс тұрғын алабындағы №48 жалпы орта мектебінің ғимаратында тұрғындармен кездесу өтті. Қабылдауда қалалық ішкі саясат және жастар істері, жұмыспен қамту және әлеуметтік қорғау, денсаулық сақтау, білім, кәсіпкерлік және индустриалды-инновациялық даму, дін істері басқармалары мен құқық қорғау органдарының жауапты қызметшілері тұрғындардың мәселелерін тыңдап, шешу жолдарын қарастырды.
–Бүгінгі іс-шара «Бейбітшілік және келісім» жобасы аясында өтіп отыр. Кездесу тұрғындардың талап-тілектерін тыңдап, өтініштерін басшылыққа жеткізу мақсатында қолға алынған. Қабылдауда мәселенің мүмкіндігінше оң шешімін табуын қарастырамыз. Сала басшылары мен арнайы мамандардан құралған жұмыс тобы тұрғындар арасында этносаралық келісім,әлеуметтік және еңбек проблемаларын шешу, халықтың денсаулығы, халыққа білім беру, бизнес ортаны дамыту, конфессияаралық келісім, заңдылық, тәртіп және қауіпсіздік сынды жеті бағыт бойынша қабылдау жүргізеді, – деді «Қоғамдық келісім» мекемесінің басшысы Ербол Байқонақов.
Жиынға ауыл тұрғындары көптеп жиналды. Тұрғындар жеке және қоғамдық мәселелерге қатысты сауалдарын тиісті мекеме басшыларына жолдап, талқылады. Айта кетейік, бұл ашық кездесу қаланың өзге аудандарында да жалғасады.
Бүгінде 1,2 млн-нан астам тұрғыны бар үшінші мегаполис халқының үштен бірін басқа этнос өкілдері құрайды. Қоғамдық келісім мен жалпыұлттық бірлік саласындағы мемлекеттік саясат аясында қалалық ассамблея маңайына топтасқан 17 этномәдени бірлестік ел игілігі жолындағы байсалды бастамалар мен бірлікті бекемдеуге атсалысып, қала аумағында жүйелі жұмыстарды жұмыла атқаруда. Ал Ассамблея жанындағы Қоғамдық келісім кеңесі, Аналар кеңесі, Медиация кабинеті, «Жаңғыру жолы» жастар қозғалысы сынды қоғамдық құрылымдар қашанда ырысты ынтымақ жолын жалғап, татулықты тұғырынан түсірмеуге сүбелі үлес қосуда.
Ассамблея мүшелерінің атсалысуымен «Алғыс айту күні», «Наурыз», «Қазақстан халқының бірлігі күні», «Офарин», «Сабантой» және этностардың тілі, мәдениеті және салт-дәстүрі күндері дәстүрлі аталып өтуде.
2000 символ
