Петропавлда өгей әкесі мен туған анасы ұрып-соққан 2-сынып оқушысы ауруханаға түсті. Бұл істі полицейлер «Денсаулыққа қасақана ауырлығы орташа зиян келтiру» бабымен тергеп жатыр, деп хабарлайды Kazinform.
Солтүстік Қазақстан облысы Полиция департаменті баспасөз қызметінің мәліметінше, 23 қараша сағат 17.00 шамасында Петропавл қаласы полиция басқармасының бірінші полиция бөліміне облыс орталығындағы орта мектептердің бірінің медицина қызметкері телефон соғып, 7 жасар 2-сынып оқушысын ұрып-соғу фактісін анықтағанын хабарлаған.
Аталған факті Қылмыстық кодекстің 107-бабының 1-бөлігі «Денсаулыққа қасақана ауырлығы орташа зиян келтiру» бойынша Петропавл қаласы полиция басқармасында Сотқа дейінгі тергеп-тексерулердің бірыңғай тізіліміне тіркелді.
Қазіргі уақытта қыз бала облыстық балалар ауруханасында ем алып жатыр.
Тексеру барысында кәмелетке толмаған баланы 26 жастағы анасы мен 33 жастағы өгей әкесі ұрып, зақым келтіргендігі анықталды. Олар өз кінәсін мойындап, мұндай жағдайға баланың тәртіпсіздігі себеп болғанын айтқан.
Істің барлық мән-жайын зерделеуге бағытталған сотқа дейінгі тергеу жүріп жатыр. Оның нәтижесі бойынша түпкілікті процестік шешім қабылданбақ.
