Түркістан облысынан барған делегация мүшелері Оңтүстік Кореяның жоғары оқу орындарының бірі Woosong университетінің Солбридж халықаралық мектебінде болды. Білім және ғылым салаларында ынтымақтастық орнату мақсатында барған Дархан Сатыбалды бастаған делегация оқу ордасының студенттік қалашығында болып, сонда білім алып жатқан қазақстандық жастармен жүздесті. Жоғары оқу орны өндіріске негізделген техникалық мамандар дайындайды.
– Оңтүстік Корея мемлекетіне білім және ғылым салаларында ынтымақтастық орнату мақсатында келіп отырмыз. Осы іссапар аясында еліміздің көптеген жастары осы оқу орнында білім алып жатқанын естіп, сіздермен арнайы кездескіміз келді. Ақпан айында Қазақстан Республикасы Ғылым және жоғары білім министрі Саясат Нұрбек Астана қаласында Вусонг университетінің өкілдерімен жүздескенін білесіздер. Нәтижесінде Түркістан қаласында «Вусонг» университетінің филиалын ашу мәселесін қарастырды. Президенттің іргелі бастамаларын жүзеге асыру бойынша Қазақстанда 12 шетелдік жоғары оқу орындарының филиалдары ашылғанын атап өту керек, – деді Дархан Сатыбалды жастармен кездесуінде.
Университетте Қазақстаннан барған 85 жас білімін жетілдіріп жатыр. 150 студент осында оқуын бітірген. Жат елде білім алып жатқан жастар туған жерге деген сағыныштарын жеткізді.
Жұмыс сапары аясында облыс әкімі бастап барған делегация құрамы Woosong қорының төрағасы Ким Джонг Хёнмен кездесті. Тараптар IT мамандығы бойынша студенттерді дайындайтын бірлескен оқу орнын ашу мәселесін жан-жақты талқылады. Түркістан облысында IT мамандарға басымдық берілуде. Аймақ басшысы білім беруге, ғылымды өркендетуге салынған инвестицияның қайтарымы келешекте айқын көрінетінін айтып, осы саладағы жобаларды қолдап келеді.
1539
