Өңірлерде «Күшіміз бірлікте» акциясы жүріп жатыр
Бүгінде су басқан аймақтарға көмек ретінде өңірлерде «Күшіміз – бірлікте» акциясы өткізілуде. Оның ішінде табиғи апат аймағындағы тұрғындарға көмек қолын созғуға Түркістан облысының жұртшылығы да үлесін қосып жатыр. Аймақта қоғам белсенділері мен волонтерлер тобы құрылып, гуманитарлық көмек жиналды. Ал облыстық жастар орталығында арнайы штаб құрылып, оған өңірдің барлық аудан-қалаларынан азық-түлік және қажетті заттар әкелуде. Қабылдау пунктіне жолға жарамды тағамдар мен киім-кешектер жинақталып, Ақтөбе облысына жәрдемнің алғашқы легі жеткізілген болатын.
Айта кетейік, су тасқынына байланысты Түркістан облысы «Жастар ресурстық орталығы» ғимаратында 27 наурыздан бастап гуманитарлық көмек қабылдайтын штаб жұмыс істеп жатыр. Сонымен бірге Түркістан облысының барлық аудан, қалаларында штабтар ашылып, тұрғындардың көмектерін қабылдауда.
Бұл жолы «Азаматтарға арналған үкімет» мемлекеттік корпорациясы коммерциялық емес акционерлік қоғамының Түркістан облысы бойынша филиалының ұжымы зардап шеккен аймақтағы тұрғындарға өз көмектерін облыстық штабқа жеткізді. Алдағы уақытта жиналған гуманитарлық заттарды Батыс Қазақстан облысына жіберу жоспарлануда.
Табиғи апат аймағындағы зардап шеккен тұрғындарға көмек қолын созамын деген волонтерлер мен облыс тұрғындары Түркістан облысы «Жастар ресурстық орталығы» ғимаратында арнайы штабта белсенді жұмыс істеуде.
Сонымен қатар, Мақтаарал, Отырар аудандары мен Арыс, Кентау қаласы екінші гуманитарлық көмектерін жеткізді.
Айта кетейік, су тасқынынан зардап шеккендерге көмек көрсету үшін еліміз бойынша «Күшіміз бірлікте» акциясы басталған болатын. Қазіргі тағда барлық облыс орталықтарында волонтерлық пункттер жұмыс істеп тұр.
