Қазақтың жақсы қасиеттерінің асылы – жомарттық, кең пейілділік. Ол адамға қызмет қылып, жақсылық жасауға ниетті жанға тән сипат. Жомарт болу — өзіңдегі барды зәру адаммен шын жүректен бөлісу. «Жылуы жоқ үйден без, қайырымы жоқ биден без»,- деген.
Қайырымдылық, адамгершілікті биік ұстап, кісілікті ту етіп, көкірегі қаяулы, жаны жаралы жанның жасын сүртіп, жылы лебізін аямай, қолдан келген жәрдемін ұсынып, достық пейілдерін танытып, көмек көрсету әрбір қайырымды мұсылманның парызы.
Ата-бабамыз қысқа жіп күрмеуге келмейтін қысылтаяң шақтарда ауызбіршілікті, адалдықты, ынтымақты ту етіп көтерген. Әсіресе, көптің мәселесін қара бастың қамынан жоғары қойған. «Бір үй аш болса, бір ауыл аш, бір ауыл аш болса, бүкіл ел аш» деген қағиданы берік ұстанып, адам тағдыры ұлыс тағдырымен тығыз байланысты екенін қапысыз таныған. «Қыран жемін шашып жейді, құзғын жемін басып жейді» деген мақалдың мәніне терең бойлап, жалғыз өзі тойғанша жұртпен бірге қиналуды жөн көрген. Бүгініне шүкір айтып, ертеңінен көп үміт күтетін жаны қайырымдылыққа құмар азаматтар арамызда жүр.
Жуырда Арыс қаласында осындай қайырымдылық іс шарасы өтті. Арыс қаласындағы орталық «Ысқақ» мешіті ұйымдастырған қайырымдылық «Рамазан қоржыны» деп аталды.
Бұл игі бастамаға «Қолғабыс» қоғамдық қоры қолдау білдіріп отыр.
Қасиетті айдың құрметіне орай өткізілген қайырымдылық шарасында Арыс қаласының бас имамы Қажымұқан Қазыбаев пен игілікке жаны құмар азаматтар әлеуметтік көмекке мұқтаж 150 отбасыға азық-түлік салынған қоржындарды үлестірді.
Азық-түлік салынған себеттер зағип жандарға, аз қамтылған отбасылар мен мүгедектігімен тіркеуде тұратын жандарға берілді. Көмек алған мұқтаж отбасылар мен көпбалалы аналар мешіт қызметкерлері мен қайырымды жандарға зор алғысын жеткізді.
1552
