Мемлекет басшысының бастамасымен қолға алынған ел аумағында өтіп жатқан «Таза Қазақстан» экологиялық акциясының «Таза өлке» апталығына түркістандық жастар да белсене қатысуда. Экологиялық мәдениетті қалыптастыру, тұрғындардың табиғатқа деген сүйіспеншілігін ояту мақсатында ұйымдастырылған шараға қызметкерлер кешкі серуен уақытын арнады. Атап айтқанда Түркістан қаласы әкімдігінің жас мемлекеттік қызметшілері жұмыс уақытынан кейін шаһардың туристік аймағы саналатын мәдени-рухани орталық аумағын қоқыстан тазартуға атсалысты.
«Тазалықты ту еткен жобаның берері мол. Осы акцияның аясында өңірдегі қаншама көше, аулалар, киелі орындар тазаланып жатыр. Тазалық деген де адамның бір әдетіне айналуы тиіс. Өйткені, табиғатты аялау, тазалықты сақтау — әрбір тұрғынның міндеті. Өйткені, осы қаланың ауасын өзі мен ата-анасы, балалары жұтады. Өзіміз серуендейміз. Ендеше киелі шаһардың әсемдігіне бірге жұмыс істейік. Өзіміз жүретін, көшенің, ауланың тазалығына жауапты болайық» — дейді жас маман Ердәулет Төрехан.
Сенбілік барысында республикалық акцияның тазару мен жаңару маусымы саналатын көктем мезгілінде басталғандығының маңызы зор екендігі айтылды. Сонымен бірге, қатысушылар тазалық барысында халық әндерін шырқады. Сенбілік соңында мамандар облыс тұрғындарына «Таза Қазақстан» республикалық акциясына атсалысуға шақырып, арнайы челлендж жолдады.
Айта кетейік, Мемлекет басшысы Қасым-Жомарт Тоқаевтың бастамасымен елімізде «Таза Қазақстан» экологиялық акциясы басталған болатын. 5 аптаға созылатын бұл науқанның бірінші аптасы «Таза өлке» деп аталады. 10 сәуір мен 11 мамыр аралығында Түркістанда «Таза өлке – Түркістан» науқаны өтеді. Әр аптаға арнайы ат беріліп, түрлі бағытта экологиялық іс-шаралар ұйымдастырылады.
