«АЙБЫН-2024» әскери-патриоттық сайысы өтті

Еліміздің тұңғыш Қорғаныс министрі, Кеңес Одағының батыры, Халық Қаһарманы, армия генералы Нұрмағамбетов Сағадат Қожахметұлына 100-жыл толуына орай «АЙБЫН-2024» облыстық әскери-патриоттық іріктеу сайысы өткізілді. Түркістан облысының қорғаныс істері жөніндегі департаменті және білім басқармасының «Облыстық қосымша білім беруді дамыту орталығы» ұйымдастырды.
Төлеби ауданы «Бәйшешек» жазғы сауықтыру легерінде өткен жарыстың ашылуына Түркістан облыстық Қорғаныс істер жөніндегі департаменті бастығының орынбасары Жандос Күлдербаев, облыстық білім басқармасы «Облыстық қосымша білім беруді дамыту орталығының» өкілдері, «Қарулы Күштерінің ардагерлері» республикалық қоғамдық бірлестігі мен жергілікті соғыс ардагерлері қатыстысып жас сарбаздарға сәттілік тілеп жылы лебіздерін білдірді.
Жарысқа барлығы 17 командадан құралған 255 жасөспірім қатысты. Белтемірге тартылу, арқада жатып кеудені көтеру, әскерилендірілген кросс, арқан тарту, пневматикалық мылтық ату, АК-74-ті жартылай шашу мен жинау, жамылғы түріндегі жалпы әскери қорғаныс киімін кию сынды жарыс түрлерінен жастар бақ сынады.
— Болашақ ел сарбаздарын жастайынан жауынгерлікке баулу, олардың бойына отаншылдық ерлік рухты қалыптастыру қазақстандықтардың ортақ парызы. Жыл сайын ұйымдастырылатын бұл шараға алдыңғы жылдармен салыстырғанда нәтижелер анағұрлым жақсы. Тартысты өткен іріктеу сайысынан анықталған 10 ер баламыз бен 5 қыз бала алдағы халықаралық сайыста жақсы нәтижелер көрсетеді деп сенемін, – дейді Қорғаныс істер жөніндегі департаменті бастығының орынбасары подполковник Жандос Күлдербаев.
«Айбын» облыстық әскери-патриоттық жастар жиынының қорытындысы бойынша І орын – Арыс командасына бұйырса, ІІ орынды – кентаулықтар жеңіп алды, ал үздік үштікке Түлкібас ауданының құрамасы тұрақтады.