Биыл Түркістан облысынан «Zhas Project» жобасы аясында NEET санатына жататын жастарға өз жобасын жүзеге асыруға 1 млн теңге беріледі. Байқау аясында 20 жас жеңімпаз атанбақ. «Zhas Project» жобасына 18-34 жас аралығындағы NEET санатындағы жастар қатыса алады.
NEET санатындағы жастар — жұмыспен қамту және білім беру санатынан тыс, уақытша жұмыс істемейтін, білім беру ұйымдарында оқымайтын немесе кәсіптік даярлаудан, қайта даярлаудан өтпейтін жастар.
«Zhas Project» жас қазақстандықтардың мүмкіндігін арттыруға бағытталған. Жобаға қатысушылар өз аймағындағы әлеуметтік мәселелерді шешуге бағытталған тиімді бастамаларды жүзеге асырып, сонымен қатар көшбасшылық қабілетін де дамыта алады. Жастар әлеуметтік және кәсіби бағдарлау бойынша жаңа білім мен дағдыға ие болады. Бизнес құру және жүргізу бойынша кәсіби менторлық қолдау ала алады.
Жоба жеңімпаздарының әрқайсысына әлеуметтік бастамаларды іске асыру үшін 1 миллион теңгеге дейін шағын гранттар бөлінеді. Болашақта 280 жоба іске асырылатын болады. Өтініштерді қабылдау 25 сәуір сағат 23:59-ға дейін жалғасады. Әр өңір бойынша жобаны басқаратын және өтініш қабылдайтын үкіметтік емес ұйымдарымен байланыс мәліметтері cisc.kz сайтында, Zhas Project бөлімшесінде көрсетілген.
Биыл «Zhas Рroject» жобасы еліміздің 20 өңірінде іске асырылмақ.
«Zhas Project» жобасының негізгі мақсаты — жастар арасында жобаларды іске асыру бойынша ақпараттық-түсіндіру, білім беру және жүргізілетін жұмыстар арқылы NEET санатындағы жастар арасында кәсіпкерлікті дамыту үшін қолайлы жағдайлар жасау.
Айта кетейік, әлеуметтік жобаларға қойылатын бірнеше талап бар. Мәселен, жоба жергілікті қоғамдастық пен әлеуметтік мәселелерді шешуге бағытталфп, 4 айдан аспайтын мерзімде іске асырылуы тиіс.
