Жуырда Түркістан қаласының әкімі Нұрбол Тұрашбеков өңір тіршілігінің айнасына айналған «Turkistan» телеарнасының қызметкерлерімен кездесті. 2021 жылдың көктемінде тұсауын кескен жас телеарнаның биыл эфирге шыққанына 3 жыл толды. Телеарна аз уақыт ішінде көрерменнің жүрегіне жол тауып, «Тұмар» телевизиялық ұлттық байқауының «Үздік аймақтық арна» номинациясын еншілеп үлгерген.
«Қысқа мерзімде билік пен бұқара арасында алтынкөпір түзіп, қоғамдағы оң өзгерістерге елеулі үлес қосып келесіздер. Бүгінгі таңда жалпы өңірдің, облыс орталығының әлеуметтік-экономикалық дамуы жайлы объективті мағлұмат таратуда сіздердің қызметтеріңіз орасан. Рухани астанамызды халықаралық деңгейде танытуға қосып жүрген еселі еңбектеріңізге ерекше алғысымды білдіремін, — деді шаһар басшысы.
Кездесуде «Turkistan Media Holding» ЖШС бас директорының орынбасары Абай Қалыбай еліміздің рухани астанасы атанған Түркістанды танытуда, қаланың оң имиджін қалыптастыруда жұмыстар жанданатынын жеткізді.
«Turkistan» телеарнасына биыл – 3 жыл. Осы уақыт ішінде ақпарат кеңістігіндегі облыстың айнасына айналған телеарнаның уақытпен бірге көш бастап келе жатқаны көрерменін қуантады. Егер есімізде болса, Түркістан өз алдына облыс орталығы ретінде бөлініп шыққанда аталған телеарна да ғұмырын осы жерден бастап еді. Иә, алғашында кәсіби мамандардың басын құрап, жоқтан барды жасау оңай болған жоқ. Қазіргі таңда телеарна ұжымы асқан еңбекқорлық пен жауапкершіліктің арқасында жетістіктерге жетіп жүр. Бүгінде 40-тан астам тележоба көпшіліктің назарына ұсынылады. Рейтингі жоғары, көптің көзайымына айналған жобалардың қатары күннен күнге артып келе жатыр. Бұл жерде телеарна басшылығы мен қызметкерлердің еңбегінің орасан екенін атап өткен жөн.
