Лудомания – құмар ойындарға потологиялық әуестігі бар адамдардың дерті. Бүгінде Дүниежүзілік денсаулық сақтау ұйымы ауруды ресми түрде мойындаған. Аталған дертке ұшыраған адамның бойында әлеуметтік, кәсіби, материалдық және отбасылық құндылықтар құлдырап, адамгершілік қасиеттері жойыла бастайды. Бұл проблеманың біздің елде де өткір тұрғаны белгілі. Соңғы үш жылда қазақстандықтар құмар ойындарға 1 трлн. теңгеден астам қаражат салған.
Жақында аталған өзекті мәселені талқылау мақсатында Қазақстан Халық партиясы Түркістан облыстық филиалы «Лудомания-қоғам дерті» тақырыбында дөңгелек үстел өткізді.
Жиынға Түркістан облыстық Жастар ресурстық орталығының төрағасы Ернар Нұралыұлы Бектаев, Түркістан дәрігерлік дене тәрбиесі диспансерінің бас маманы Дамира Дарменова , Түркістан облысы дін істері басқармасы «Дін мәселелерін зерттеу орталығының»бөлім бастығы Қайрат Құралбайұлы Салықбаев, Қазақстан халық партиясы Түркістан облыстық филиалы әйелдер қанатының төрайымы Айғаным Нұрмаханқызы Ордабекова, партия белсенділері қатысты.
Шара барысында сөз алған облыстың жастар жетекшісі Бектаев Ернар елімізде лудоманиямен 500000 адам есепте тұрғанын және оның алдын алуға бағытталған 400-ге жуық іс-шара өткізу жоспарлануда екенін жеткізді. Бұл бағытта аға буын, жастар,құқық қорғау орындары, психолог және басқа мамандар ел-елді аралап, індеттен сақтану жолдарын түсіндіруде.
Бұл бағытта діни мекеме қызметкерлері, аналар ұйымы шет қалған емес.
Шара соңында қауіпті індетті ауыздықтаудың амалдары айтылды.
Айта кетейік, Мемлекет басшысы Қасым-Жомарт Тоқаевтың төрағалығымен өткен Қауіпсіздік Кеңесінің отырысында халық арасындағы құмар ойынға тәуелділік мәселелері жан-жақты талқыланған болатын.