Не белгілі?
Әлеуметтік желілерде тараған видео Абай облысына қарасты Таскескен кентінде түсірілгені айтылуда. Бейнежазбада ірі, жыртқышқа ұқсас жануар ағаштың жанында жатыр. Шынжыр жуан ағаш діңін айналып өткен, алайда оның нақты қай жерге бекітілгені көрінбейді. Айналасында вольер немесе қоршау жоқ.
https://vt.tiktok.com/ZSmLRmeW8/
Видеоға жазылған пікірде жануардың талапқа сай емес жағдайда ұсталып отырғаны, бұл айналадағы адамдар үшін қауіп төндіруі мүмкін екені айтылып, Қазақстан Республикасының заңнамасы бұзылуы ықтимал деген күдікпен уәкілетті органдардан тексеру жүргізу сұралған.
Тексеру нәтижесі
Абай облысының полиция департаменті ақпаратты тексеріп, қызметкерлер Уржар ауданына қарасты алыс елді мекен — Қаракөл ауылына (қыстау «Бірінші ферма») шыққан. Жолдың қиындығына байланысты олар оқиға орнына қарда жүретін техникамен жеткен.
Полицияның мәліметінше, видеодағы жануар — қасқыр мен хаски тұқымының буданы, аты — Боря. Ол мамыр айында бір жасқа толады. Жануар отбасының қолында өсіп жатыр және иесіне мал бағуға көмектеседі. Тексеру барысында оған қатыгездік көрсетілгені анықталмаған, ал ұсталуы қолданыстағы талаптарға сай деп танылған.
Құқық қорғау органдары жануар иесінің Боряға жақындаған сәті түсірілген видеоны да жариялады. Онда иттің агрессия танытпайтыны байқалады. Жанында жүрген басқа иттер де одан қорықпайды.
Полиция өкілдері еске салды: егер жануарларға қатыгездік көрсету деректері байқалса, азаматтар дереу 102 нөмірі арқылы полицияға хабарлауы тиіс.
Бұған дейін
Семей қаласында да ерекше жағдай тіркелген. Қала тұрғыны үйінің ауласынан мойнында қарғыбауы бар елікті байқап, полицияға хабарлаған. Жануардың жағдайы қанағаттанарлық болған, адамдардан үрікпеген. Мамандар еліктің бұрын адам қолында болғанын және табиғи ортада өздігінен өмір сүре алмайтынын анықтады. Соның нәтижесінде жануар Семей қаласындағы биологиялық орталыққа тапсырылып, бақылауға алынды.
