Оқиға қалай болды?
Желіде тараған видеода полиция қызметкері ер адамды ұстап тұр, ал ол әйел адамға қарай балағат сөздер айтып, агрессивті мінез танытады. Видео авторының айтуынша, жанжал мүмкіндігі шектеулі жандарға арналған тұрақ орнына байланысты туындаған. Әйел өзінің мүгедектігі бар екенін айтып, сол жерге көлігін заңды түрде қойғанын жеткізген.
Сонымен қатар көлік иесі автокөлігінің алдыңғы әйнегі зақымдалғанын байқап, полиция қызметкерінен тиісті шара қолдануды сұраған.
Пікірлерде кейбір қолданушылар полиция қызметкерінің әрекетіне наразылық білдіріп, оның жағдайға тым жұмсақ қарағанын алға тартқан.
Полиция не дейді?
Астана қалалық полиция департаментінің мәліметінше, оқиға 9 ақпанда болған. Құқық қорғау органдары шақыртуға жедел жетіп, заңға қайшы әрекеттердің жолын кесіп, жағдайды бақылауға алған.
https://vt.tiktok.com/ZSmLRSoRL/
Tengrinews баспанасынан видео
«Тексеру барысында жанжал бөтен мүлікке келтірілген залалға байланысты шыққаны анықталды. Сондай-ақ ер адамның психикалық денсаулық орталығында есепте тұрғаны және арнайы медициналық көмекті қажет ететіні белгілі болды», — деп хабарлады департамент өкілдері.
Полиция қызметкерлері ер адамның жағдайын ушықтырмас үшін ұстамды тактика қолданғанын атап өтті. Нәтижесінде ол арнайы медициналық мекемеге жеткізілген.
Ведомство мәліметінше, келтірілген материалдық шығын толық өтелген, жәбірленуші тараптың қазіргі таңда ешқандай талабы жоқ.
